Techie IT
बुधबार, असोज १४,२०७७

नेपाल बैंकद्वारा कोरोना संक्रमण रोकथाम कोषमा तीन करोड ४६ लाख रुपैयाँँ जम्मा


काठमाडौं, साउन २८
नेपाल बैंकले कोरोना रोकथाम कोषमा तीन करोड ४६ लाख रुपैयाँँ प्रदान गरेको छ । बैंकले हरेक वर्ष आफ्नो मुनाफाको एक प्रतिशतबराबरको रकम संस्थागत सामाजिक उत्तरदायित्व कोषमा जम्मा गर्दै आएको र उक्त कोषमा जम्मा भएको रकम नेपाल राष्ट्र बैंकले निर्देशन गरेबमोजिम विभिन्न आर्थिक, सामाजिक, सांस्कृतिक, प्राकृतिक प्रकोप, शिक्षा, स्वस्थ्य, सरसफाइ, वातावरण संरक्षण तथा अन्य सामुदायिक हित संरक्षण लगायतका क्षेत्रहरूमा खर्च गर्दै आएको छ ।

हाल देशभर फैलिएको कोरोना भाइरसको संक्रमण रोकथाम र नियन्त्रण तथा कोरोना भाइरसका कारणबाट सृजना हुनसक्ने जोखिम न्यूनीकरण तथा व्यवस्थापनका लागि नेपाल सरकारले चालेका कदममा साथदिन मौद्रिक नीति, २०७७/७८ मा भएको व्यवस्थातथा नेपाल राष्ट्र बैंकबाट भएको निर्देशनअनुसार बैंकको संस्थागत सामाजिक उत्तरदायित्व कोषमा मौज्दात रहेको तीन करोड ४६ लाख रकमको चेक नेपाल सरकारले स्थापना गरेको कोरोना संक्रमण रोकथाम, नियन्त्रण र उपचार कोषमा जम्मा हुनेगरी अर्थमन्त्री डा. युवराज खतिवडालाई बैंक सञ्चालक समितिका अध्यक्ष वासुदेव अधिकारीले हस्तान्तरण गरेको जानकारी बैंकले दिएको छ ।

उक्त चेक हस्तान्तरण कार्यक्रममा अर्थमन्त्री डा. खतिवडाले कोरोना संक्रमण रोकथाम र नियन्त्रण गर्ने नेपाल सरकारको प्रयासमा नेपाल बैंकले पु¥याएको महत्वपूर्ण सहयोगका लागि धन्यवाद दिए । उनले बैंकको कार्यसम्पादनमा आएको सुधारको प्रशंसा गर्दै आगामी दिनहरूमा बैंकलाई अझ प्रतिस्पर्धी बनाउँदै लैजान र बैंकको थप प्रगतिका लागि शुुभकामना समेत दिएका छन् ।

कार्यक्रममा बैंक सञ्चालक समितिका अध्यक्ष अधिकारीले सरकारले चालेका कदमहरूमा बैंकको सदैव साथ रहने र कोरोना संक्रमण रोकथाम, नियन्त्रण र उपचारका लागि नेपाल बैंकले सबैभन्दा पहिला सहयोगको घोषण गरेको र हालसम्म संघीय सरकारको कोषमा चार करोड ४६ लाख र प्रदेश सरकारहरूलाई पाँच लाखका दरले ३५ लाख गरी कुल चार करोड ८१ लाख आर्थिक सहयोग प्रदान गरिएको जानकारी गराए ।

उक्त कार्यक्रममा बैंकका प्रमुख कार्यकारी अधिकृत कृष्णबहादुर अधिकारीले मौद्रिक नीति र नेपाल राष्ट्र बैंकको निर्देशन पालना गर्दै बैंकको वित्तीय अवस्थामा थप सुधार ल्याउन बैंक व्यवस्थापन प्रतिबद्ध रहेको र यस कार्यमा नेपाल सरकारबाट निरन्तर सहयोग पाइरहने विश्वास व्यक्त गरे ।

चेक हस्तान्तरण कार्यक्रममा नेपाल राष्ट्र बैंकका गभर्नर महाप्रसाद अधिकारी, अर्थ मन्त्रालयका सचिव शिशिरकुमार ढुङ्गाना, डेपुटी गभर्नर चिन्तामणि शिवाकोटी, नेपाल बैंक लिमिटेड सञ्चालक समितिका सदस्य, सहसचिव केदारप्रसाद पनेरु, अर्थ मन्त्रालयका सहसचिव झक्कप्रसाद आचार्य, नेपाल बैंक लिमिटेडका सहायक प्रमुख कार्यकारी अधिकृत प्रकाशकुमार अधिकारी र बैंकका कम्पनी सचिवश्री केशवप्रसाद भण्डारी लगायतको उपस्थिति रहेको थियो । (आर्थिक दैनिकबाट)


क्याटेगोरी : कर्पोरेट/वित्त


तपाईको कमेन्ट लेख्नुहोस्