Techie IT
बिहीबार, माघ १५,२०७७

राउटर यूपीएस-एडेप्टर प्रयोग गर्न टेलिकमको आग्रह


काठमाडौं ।
नेपाल टेलिकमले उपलब्ध गराइरहेको एफटीटीएच सेवामा विद्युत् आपूर्ति बन्द भएको समयमा पनि भ्वाइस सेवा अवरुद्ध हुन नदिन राउटर यूपीएस÷एडेप्टर प्रयोग गर्न कम्पनीले आग्रह गरेको छ । टेलिकमले परम्परागत तामाको तारबाट चल्ने ल्याण्डलाइन टेलिफोनलाई एफटीटीएच अर्थात् फाइबर टु द होम सेवाले विस्थापित गरी भ्वाइस तथा डाटा सेवा उपलब्ध गराइरहेको छ । कम्पनीले यही सेवामार्फत टेलिभिजन सुविधा समेत उपलब्ध गराउने तयारी गरिरहेकाले यस सेवाप्रतिको आकर्षणमा निरन्तर वृद्धि हुने समेत जनाएको छ ।

कम्पनीका अनुसार विद्युत् आपूर्ति अवरुद्ध भएको समयमा एफटीटीएचको भ्वाइस सेवा अवरुद्ध हुन जाने हुनाले इन्भर्टरको फुल व्याकअप भएका घर तथा कार्यालयबाहेक अन्य स्थानहरूमा भ्वाइस सेवा प्रयोगमा असुविधा उत्पन्न भएको पाइएको छ । हाल बजारमा सानो खालको राउटर यूपीएस वा एडेप्टर समेत सहज रुपमा उपलब्ध भएको हुनाले ग्राहकहरूले आफ्नो सुविधाका लागि यस्ता डिभाइस प्रयोग गर्न कम्पनीले सबैलाई आग्रह गरेको छ ।

राउटर यूपीएस जस्ता साना डिभाइस विभिन्न क्षमताका हुन्छन् र विद्युत् नभएको समयमा केही घण्टासम्म सेवाको निरन्तरताका लागि उपयुक्त हुन्छन् । एडेप्टरमा भने त्यसमा भएको ब्याट्री विद्युत् उपलब्ध भएको समयमा आफैँ चार्ज हुन्छ र विद्युत् नभएको समयमा त्यही ब्याकअप पावर खपत हुन्छ । कम्पनीले वितरण गरिरहेको एफटीटीएच सेवाका लागि १२ भोल्ट र एक एम्पियर क्षमताको एडेप्टर उपयुक्त हुने भएकाले ग्राहकवर्गले आफ्नो आवश्यकता तथा सहजताअनुसार बजार वा अनलाइनबाट खरिद गरी प्रयोग गर्न कम्पनीले आग्रह गरेको छ ।

हाल कम्पनीले एफटीटीएच सेवामा विभिन्न प्याकेजहरू आकर्षक दरमा उपलब्ध गराइरहेको छ । प्राविधिक रुपले सम्भव हुने स्थानहरूमा पुरानो ल्याण्डलाइन फोनलाई एफटीटीएच प्याकेजअन्तर्गत एक थान वाइफाई राउटर (सीपीई) र एक सय मिटर ड्रप फाइबर निःशुल्क उपलब्ध गराई नयाँ एफटीटीएच जडान गर्दै आएको छ । कम्पनीका अनुसार यसका लागि ग्राहकवर्गले नजिकको दूरसञ्चार कार्यालयमा सम्पर्क गर्नुपर्दछ । उच्च गतिको इन्टरनेट र भिडियो सेवाहरू, टेलिफोन सेवा र भविष्यमा टेलिभिजन समेत उपलब्ध भएपश्चात् ग्राहकवर्गका लागि कम्पनीको ट्रिपल प्ले सुविधा थप आकर्षक हुने विश्वास गरिएको छ । (आर्थिक दैनिकबाट)


क्याटेगोरी : कर्पोरेट/वित्त


तपाईको कमेन्ट लेख्नुहोस्