Techie IT
१७ माघ २०७९, मंगलबार

सीएले पाइरहेको समकक्षता स्थगित गर्ने त्रिविको निर्णयलाई फिर्ता गराउन सहयोग गर्न आग्रह


काठमाडौं ।
नेपाल चार्टर्ड एकाउन्टेन्स संघले चार्टर्ड एकाउन्टेन्ट (सीए)ले पाइरहेको समकक्षता स्थगित गर्ने त्रिभुवन विश्वविद्यालय (त्रिवि)को निर्णय फिर्ता लिन पहल गर्न सरकारसँग आग्रह गरेको छ । संघको प्रतिनिधिमण्डलले बुधबार शिक्षा, विज्ञान तथा प्रविधिमन्त्री कृष्णगोपाल श्रेष्ठलाई भेटी त्रिविले सीए उपाधि प्राप्त गरेका विद्यार्थीलाई विगतमा दिँदै आएको स्नाकोत्तर समकक्षता स्थगित गरेको जानकारी गराउँदै उक्त निर्णय फिर्ताका लागि पहल गरिदिन आग्रह गरेको हो ।

भेटमा मन्त्री श्रेष्ठले तत्कालै सरोकारवाला पक्षको बैठक राखेर सीएले पाइरहेको समकक्षता स्थगित गर्ने त्रिभुवन विश्वविद्यालयको कदमबाट सिर्जित समस्या हल गर्ने बताए । ‘राज्यले पढ्न बोलाउने, पढाउने र पास गरिसकेपछि बेवारिसे बाउन मिल्छ र ?’ त्रिविको कदमप्रति प्रश्न गर्दै मन्त्री श्रेष्ठले भने, ‘तुरुन्तै त्रिभुवन विश्वविद्यालय, नेपाल चार्टर्ड एकाउन्टेन्ट संस्था, नेपाल चार्टर्ड एकाउन्टेन्ट संघ र शिक्षा मन्त्रालयबीच मिटिङ राखेर यो समस्या हल गर्न पहल गर्छु ।’

संघका अध्यक्ष आनन्द शर्माको नेतृत्वको प्रतिनिधिमण्डलले कठोर मेहनत, धैर्य र लगनशीलताका साथ सीए उपाधि प्राप्त गरेका विद्यार्थीहरू त्रिविको कदमबाट प्रत्यक्ष प्रभावित भएको जनाएको छ । त्रिविले एउटा सूचना समेत प्रकाशित नगरी सीएलाई स्नातकोत्तरमा भर्ना नलिएको र समकक्षता दिने समयमा भर्ना भई अध्ययन सकेर अहिले उत्तीर्ण भएकालाई समेत ट्रान्स्सकिप्ट र प्रमाणपत्र दिन इंकार गरेको उनीहरूको गुनासो थियो ।

समकक्षताको प्रमाणपत्र उपलब्ध नहुँदा सम्भावित रोजगारीको अवसर, संस्थागत नियुक्ति, उच्च शिक्षा र अध्ययन, अनुसन्धानलगायत अवसरबाट सीएहरू विमुख हुनुपरेको संघको गुनासो छ । ‘विश्वभर चार्टर्ड एकाउन्टेन्टलाई कर, लेखा, लेखापरीक्षण तथा वित्त क्षेत्रका विषयविज्ञको रूपमा लिइन्छ र यसको पाठ्यक्रम सोहीअनुसार डिजाइन गरिएको हुन्छ ।

विज्ञको रूपमा विश्वभर सम्मानित यो पेसालाई राज्यले उचित व्यवहार नगर्दा सीएहरू पेसागत सम्मान र सामाजिक प्रतिष्ठाका खोजी तथा उच्च शिक्षा हासिल गर्न विदेशिने खतरा छ,’ संघको प्रतिनिधिमण्डलले भेटका अवसरमा शिक्षामन्त्रीलाई बुझाएको ध्यानाकर्षणपत्रमा भनिएको छ । अन्तर्राष्ट्रिय अभ्यासमा चार्टर्ड एकाउन्टेन्ट शिक्षाको एकेडेमिक कोर्स म्यापिङ गरी समकक्षता दिने व्यवस्था रहेको संघको भनाइ छ । संघले भेटमा भारत तथा बेलायतको समकक्षता प्रदान गर्ने निकायको सूचना पनि मन्त्रीलाई बुझाएको छ ।

समकक्षता स्थगनले सीए उपाधि प्राप्त विद्यार्थीको थप अध्ययन, सरकारी क्षेत्रमा रोजगारी तथा संस्थागत नियुक्तिमा समस्या खडा गरेको भन्दै संघले आवश्यक नीतिगत व्यवस्था गरी त्यस्ता विद्यार्थीलाई समकक्षता दिने व्यवस्था मिलाउन आग्रह गरेको छ । निर्जा श्रेष्ठले सहजीकरण गरेको प्रतिनिधिमण्डलमा संघका अध्यक्ष आनन्द शर्मा वाग्ले, उपाध्यक्ष रमेशकुमार धिताल, महासचिव तेजप्रसाद सुवेदी र सदस्य कुनाल कयाल सहभागी रहेको संघले जनाएको छ । (आर्थिक दैनिकबाट)


क्याटेगोरी : समाचार


तपाईको कमेन्ट लेख्नुहोस्