Techie IT
१२ मंसीर २०७८, आईतबार

रबर कोन हस्तान्तरण


ललितपुर ।
ललितपुर महानगरपालिकाले सवारी दुर्घटना न्यूनीकरणका लागि ट्राफिक प्रहरी महाशाखालाई रबर कोन हस्तान्तरण गरेको छ । महानगरपालिकाका प्रमुख चिरीबाबु महर्जनले आज सोमवार महाशाखाका प्रमुख प्रहरी वरिष्ठ उपरीक्षक (एसएसपी) जनक भट्टराईलाई २०० थान रबर कोन, एक सय थान डण्डी र ३० थान ह्वील लक हस्तान्तरण गरे ।

बढ्दो दुर्घटना घटाउन धोबीघाट, एकान्तकुना, जावलाखेल, कुसुन्तीलगायतका क्षेत्रमा आजैदेखि ती सामग्री व्यवस्थितरुपमा राखिने महर्जनले राससलाई बताए । उनले भने, “यस्ता घटना न्यूनीकरण गर्ने जिम्मा महानगरपालिकाको रहेको हुँदा विद्यालय तहका बालबालिकालाई ट्राफिक नियमबारे अध्ययन तथा अध्यापनसमेत गराउने भएका छौं, आगामी माघ महिनाभित्रमा ललितपुरको मुटु मानिने लगनखेल बजार क्षेत्र सुधार गर्ने भएका छौं ।”

यसैगरी महानगरपालिकाले शहरको सौन्दर्य वृद्धि गराउन छरिएर रहेका तारलाई मुठा पार्ने, २४सै घण्टा ट्राफिक जाम नियन्त्रण गर्न नगर प्रहरीलाई बस्ने ठाउँको व्यवस्थापन गरिदिने र महानगरपालिकाको चक्रपथ क्षेत्रमा पर्ने ७।९ किलोमिटर सडकमा हुने दुर्घटना हटाउन सडक बत्तीलगायतका आवश्यक वस्तुको व्यवस्थापनसमेत गर्ने महर्जनले जानकारी गराए ।

उपरीक्षक भट्टराईले भीडभाड बढी हुने स्थानमा महानगरपालिकाका नगर प्रहरीलाई तदारुकताका साथ काम गर्न आग्रह गरे । उनले भने, “सानेपा क्षेत्रमा हुने दुर्घटना हटाउन आफूहरुले सडक बत्ती जडानको काम गरिरहेका छौं भने बी एण्ड बी आसपासका क्षेत्रमा सडक बत्ती जडान गर्न समन्वय भइरहेको छ ।” महानगरपालिकाले आफूहरुलाई गरेको सहयोगको मूल्याङ्कन गर्दै त्यसले प्रतिफल दिने गरी काम गरिने प्रतिबद्धता उनले व्यक्त गरे ।

सामान खरिदमा महानगरपालिकाले करिब रु. पाँच लाख खर्चिएको जिन्सी शाखाले जनाएको छ । महानगरपालिकाले हिजोदेखि आफ्ना नगर प्रहरीलाई ट्राफिक व्यवस्थापनसम्बन्धी ज्ञान दिलाउने उद्देश्यका साथ १५ दिने तालीम शुरु गरेको छ । सो तालीममा एक साता ‘इनडोर’ र अर्को एक साता ‘आउटडोर’ बारेमा जानकारी प्रदान गरिने बताइएको छ ।


क्याटेगोरी : समाचार


तपाईको कमेन्ट लेख्नुहोस्