Techie IT
१० असार २०७८, बिहीबार

उमेर हद पुगेका स्वयंसेविकालाई भीमदत्तले एक लाख दिने


कञ्चनपुर ।
कञ्चनपुरको भीमदत्त नगरपालिकाले उमेरको हद लागेका महिला स्वास्थ्य स्वयसेविकालाई एक लाख रुपैयाँ सहयोग गर्ने भएको छ । लामो समयदेखि महिला स्वास्थ्य स्वयंसेविकामार्फत स्वास्थ्य क्षेत्रमा सेवा गरिरहेका स्वयंसेविकालाई घर जाने बेला एक लाख रुपैयाँ सहयोग गर्ने भएको हो । अन्तर्राष्ट्रिय महिला स्वास्थ्य स्वयंसेविका दिवसका अवसरमा भीमदत्त नगरका मेयर सुरेन्द्र विष्टले उमेर हदका लागि स्वास्थ्य स्वयम सेविका कामबाट बाहिरिने महिला स्वास्थ्य स्वयंसेविकालाई घर जाने बेला एक लाख आर्थिक प्याकेज दिने घोषणा गरेका हुन ।

‘स्वास्थ्य क्षेत्र सुधारका लागि निःस्वार्थ भएर काम गर्ने महिला स्वास्थ्य स्वयसेविका उमेर हदका कारण घर जानुपर्ने अवस्थामा नगरपालिकाले योगदानको कदर गर्छ’, ‘मेयर विष्टले भने, ‘सोबापत नगरपालिकाले कम्तिमा स्थानीयका सरकारका तर्फबाट सामाजिक उत्तरदायित्व निर्वाह गर्छ ।’ यस बारेमा कार्यविधि बनाएर भीमदत्त नगरपालिकाले कुनै पनि महिला स्वास्थ्य स्वयसेविका घर जाने बेला रित्तो हात लिएर जानुपर्ने बाध्यता नरहने मेयर विष्टले बताए ।

नगरपालिकाले कोडिभ १९ रोकथाम तथा नियन्त्रणका लागि अहमभूमिका निर्वाह गर्ने नगरभरकै १सय ५१ महिला स्वास्थ्य स्वयंसेविकालाई समेत सम्मान गरेको थियो । भीमदत्त नगरपालिका क्षेत्रका कार्यरत महिला स्वास्थ्य स्वयंसेविकाले नगर प्रमुखले घोषणा गरेको कार्यक्रमबाट हर्षित भएका छन । निःस्वार्थ भावनाले ग्रामीण भेगमा काम गर्दै आएका महिला स्वास्थ्य स्वयंसेविकाको भूमिका उच्च रहे पनि राज्यबाट उनीहरुको वृत्तिविकासका कुनै ठोस योजना नल्याएको परिप्रेक्ष्यमा भीमदत्त नगरपालिकाले अघि सारेको निर्णयबाट घर जाने बेला महिला स्वास्थ्य स्वयंसेविका राहत आभास गर्नेछन् । (आर्थिक दैनिकबाट)


क्याटेगोरी : समाचार


तपाईको कमेन्ट लेख्नुहोस्