Techie IT
बुधबार, मंसीर १७,२०७७

अमेरिकामा कोरोनाबाट दुई लाख ५० हजार बढीको मृत्यु, न्युयोर्कका विद्यालय बन्द


न्युयोर्क ।
अमेरिकामा कोभिड–१९ संक्रमित दुई लाख ५० हजारभन्दा बढी व्यक्तिको मृत्यु भएको छ । कोभिड–१९ संक्रमणमा पुनः वृद्धि देखिएपछि अमेरिकी सहर न्युयोर्कस्थित विद्यालयहरू बन्द गरी संक्रमण नियन्त्रण गर्ने अन्य उपायसमेतलाई अवलम्बन गर्न थालिएको छ ।

एएफपीका अनुसार युरोपमा कोभिड–१९ को नियन्त्रणका लागि भन्दै विभिन्न उपायहरूलाई अवलम्बन गर्ने युरोपेली मुलुकहरूको तयारीविरुद्ध ती मुलुकहरूमा बजार गतिविधि नियन्त्रणविरोधी विरोधहरू भएका छन् । अमेरिकामा बिहीबारसम्म कोभिड–१९ संक्रमितमध्ये दुई लाख ५० हजार ४ सय २६ व्यक्तिको मृत्यु भएको छ भने बुधबार एकै दिनमा एक लाख ५७ हजार ९ सय ५० जना थप व्यक्ति संक्रमित भएका जोन हकिन्स विश्वविद्यालयले बताएको छ ।

अमेरिकी राज्यहरू र सहरले कोभिड संक्रमण दरमा नियन्त्रण नआएपछि नियन्त्रणका पूराना तथा नयाँ उपायलाई अभ्यासमा ल्याउने बताएका छन् । न्युयोर्कका नगरप्रमुख बिल डे ब्लासियोका अनुसार सहरमा कोभिड–१९ संक्रमितको सङ्ख्या पुनः बढ्न थालेपछि सहरमा रहेका करिब एक हजार ८०० विद्यालयहरूलाई बन्द गरिएको छ । ती विद्यालयहरूले दूर शिक्षालाई बिहीबारदेखि नै अभ्यासमा ल्याएका छन् ।

नगर प्रमुख ब्लासियोले भने, ‘हामीले कोभिड–१९ को दोस्रो लहरविरुद्ध लड्न जरुरी भएको छ ।’ अमेरिकी औषधि कम्पनी फाइजरले विकास गरेको खोपले ९४ प्रतिशत बिरामीमा सकारात्मक नतिजा दिएको भन्ने खबरबाट आशावादी बनेका अमेरिकीहरूलाई अमेरिकाको सबैभन्दा बढी जनघनत्व रहेको न्यूयोर्क सहरमा नियन्त्रणका लागि विद्यालय बन्द गर्ने नीतिपछि थप सशंकित बनेका छन् ।

युरोपमा अझै हुन सकेन संक्रमण नियन्त्रण
यसैबीच महामारीका कारण यूरोप विश्वको सबैभन्दा बढी प्रभावित क्षेत्र बनेको छ । विश्व स्वास्थ्य संगठनका अनुसार विश्वव्यापी रूपमा गत हप्ता मृत्यु भएका कोभिड–१९ संक्रमितमध्ये यूरोपमा ४९ प्रतिशत रहेकोमा यो साता उक्त सङ्ख्या ४६ प्रतिशतमा झरेको भएपनि अझै यूरोप महामारीका कारण विश्वको बढी प्रभावित मुलुकका रूपमा रहेको छ ।

विश्वविद्यालयको तथ्यांकअनुसार संक्रमण र मृत्युदर घटेका मुलुकहरूमा दक्षिणपूर्वी एशियाली राष्ट्रहरू देखिएका छन् । एएफपीले विश्वव्यापीरूपमा संकलन गरेको तथ्यांकअनुसार विश्वभर कोभिड–१९ का कारण १३ लाखभन्दा बढी मानिसको मृत्यु भइसकेको छ भने पाँच करोड ५० लाख व्यक्तिमा कोभिड–१९ संक्रमण पुष्टि भएको छ । संक्रमणका कारण बढी प्रभावित यूरोपका मुलुकहरूमध्ये एक स्वीट्जरल्याण्डमा व्यवहारिकरूपमा अस्पतालहरू पूर्णतया भरिएको भन्दै स्वीस सोसाइटी फर इन्टेन्सिभ केयर मेडिसिनले महामारीका कारण सघन उपचार कक्षको अभाव भएको जनाएको छ ।

स्विट्जरल्याण्डमा अस्पतालहरूले अस्थायी शय्याहरू थपेका छन् भने सहयोगका लागि सेनालाई आग्रह गरिएको छ । यूरोपका अन्य प्रभावित मुलुक स्पेन, इटाली, फ्रान्स, जर्मनी र रूस लगायतका सरकारले नियन्त्रणका लागि थप कडा उपायको अवलम्बन गर्ने बताइरहँदा ठाउँठाउँमा विरोधको सामना गर्नुपरेको छ । हङ्गेरीले स्वास्थ्य संकटकालको घोषणा गरेको छ भने आंशिक लकडाउन पनि गरेको छ र यसलाई आगामी फेब्रुअरीसम्म कायम राख्नसकिने बताएको छ । फ्रान्सका प्रभावित क्षेत्रहरूमा लकडाउनलाई थप बढाउने सरकारका प्रवक्ताद्वारा जारी विज्ञप्तिमा उल्लेख गरिएको छ ।

जर्मनीको बर्लिनमा नियन्त्रणका उपायको विरोध गर्दै हजारौँ नागरिक सडकमा उत्रन थालेपछि प्रहरीले प्रदर्शनकारीलाई तितरभितर पार्न मास्क नलगाई प्रदर्शनमा उत्रेका नागरिकमाथि बल प्रयोग गरेको छ भने विरोधीले सरकारविरुद्ध ‘शेम ! शेम !’ भन्दै नाराबाजी गरेका छन् । अफ्रिकाका पनि घनाबस्ती रहेका सहरहरू तथा गरिब मुलुकहरूमा संक्रमण दर नियन्त्रणमा आउन सकेको छैन । संक्रमणका कारण व्यवसायिक तथा कृषि गतिविधिहरू प्रभावित बन्दा पहिल्यै खाद्यान्न अभाब झैल्दै आएका अफ्रिकी मुलुकहरूमा समस्या थप जटिल बनेको छ । (आर्थिक दैनिकबाट)


क्याटेगोरी : अन्तर्राष्ट्रिय


तपाईको कमेन्ट लेख्नुहोस्


थप समाचार