Techie IT
बुधबार, कात्तिक १२,२०७७

राजापाक्षे परिवार अझ शक्तिशाली भएर सत्तामा रहने संकेत


कोलम्बो, साउन २३
श्रीलंकामा सत्ताधारी राजापाक्षे परिवार अझ शक्तिशाली भएर सत्तामा रहने देखिएको छ । हालै भएको निर्वाचनमा सत्तारुढ दलले अत्यधिक मत पाएको प्रारम्भिक विवरणहरूले देखाएकाले उनीहरू थप शक्तिशाली हुने देखिएको हो ।

संसदीय निर्वाचनको नतिजा बिहीबारदेखि सार्वजनिक हुन थालेको छ । प्रारम्भिक नजिता अनुसार प्रधानमन्त्री महेन्दा राजापाक्षेको परिवारले झण्डै ७२ प्रतिशत मत प्राप्त गरेर अग्रता लिइरहेको छ । यो विवरण देशको दक्षिणी क्षेत्रको हो । प्रधानमन्त्री राजापाक्षेका भाइ गोटावाया राजापाक्षेले यसअघि गत नोभेम्बरमा भएको राष्ट्रपतीय निर्वाचनमा विजय हासिल गरेका थिए । त्यति बेलादेखि श्रीलंकामा भाइ राष्ट्रपति र दाइ प्रधानमन्त्री हुन् ।

श्रीलंकामा राजापाक्षेको परिवारलाई राजनीतिक क्षेत्रमा निकै शक्तिशाली र चर्चित परिवार मानिन्छ । यो परिवारले लामो संघर्ष पनि गरेको इतिहास छ । गत सन् २०१९ मा भएको मुस्लीम धर्मावलम्बीहरूलाई लक्षित गरेर गराइएको ठूलो विस्फोटनको घटनालाई उनीहरुले राष्ट्रियतासँग जोडेर मतमा गरेकाले उनीहरु थप लोकप्रिय भएको बताइएको छ । सो घटनामा परी २ सय ७९ जनाको मृत्यु भएको थियो ।

श्रीलंकामा दशकौँ चलेको तामिल विद्रोहीसँगको द्वन्द्व अन्त्य गर्न दुवै दाजुभाइको महत्वपूर्ण भूमिका रहेको मानिन्छ । सन् २००९ मा महेन्दाले प्रधानमन्त्रीको रुपमा र गोटावायाले उच्च कर्मचारीको रुपमा भूमिका खेलेका थिए । प्रारम्भिक नतिजाका अनुसार प्रमुख विपक्षी दल एसजेवीले कुल मतको १३ प्रतिशत मात्रै मत प्राप्त गरेको छ । त्यसैगरी वामपन्थी पार्टी जेजेबीले आठ प्रतिशत र पुर्वप्रधानमन्त्री रनिल विक्रमादित्यको युनाइटेड नेशनल पार्टी (यूएनपी) ले चार प्रतिशत मात्रै मत पाएका छन् ।

कोरोनाभाइरसको त्रासका कारण मत गणनामा ढिलाइ भइरहेकाले नतिजा सार्वजनिक गर्न पनि ढिलाइ भइरहेको अधिकारीहरुको भनाइ छ । उनीहरूले बिहीबार अ‍ेरसम्ममा नतिजा सार्वजनिक हुनसक्ने अनुमान गरेका छन् । श्रीलंकाको संसदमा निर्वाचित हुने कुल २ सय २५ सांसदमध्ये १३० देखि १३५ जनासम्म राजापाक्षेको पार्टीका उम्मेदवार निर्वाचित हुने निजी क्षेत्रबाट भएको सर्वेक्षणले देखाएको छ ।

संविधान नै परिवर्तन गर्न मिल्नेगरी दुई तिहाइ बहुमत आउने सर्वेक्षणकर्ता तथा विश्लेषकहरुले बताएका छन् । ‘हामीले संसदमा निर्वाचनबाट दुई तिहाइ सांसदहरुलाई निर्वाचित गराएर ल्याउछौँ भन्नेमा हामी ढुक्क छौँ’, प्रधानमन्त्री राजापाक्षेले बुधबार भनेका थिए । श्रीलंकाले अत्यन्त आर्थिक चुनौती भोगिरहेकाले नयाँ संसद र त्यसपछि बन्ने नयाँ सरकारले त्यसको मुख्य सामना गर्नु पर्ने देखिन्छ । रासस/एएफपी (आर्थिक दैनिकबाट)


क्याटेगोरी : अन्तर्राष्ट्रिय


तपाईको कमेन्ट लेख्नुहोस्