Techie IT
शनिबार, मंसीर १३,२०७७

फिलिपिन्सको अर्थतन्त्र मन्दीतर्फ


मनिला, साउन २३
दक्षिण पूर्वी एसियाली मुलुक फिलिपिन्सको अर्थतन्त्र पहिलो चौमासिक अवधिमा तिब्र गतिमा संकुचित भएको छ । एएफपीका अनुसार फिलिपिनी तथ्याँक विभागले बिहीबार सार्वजनिक गरेको विवरणमा कोरोनाभाइरस नियन्त्रणका लागि गरिएको लकडाउनका कारण व्यवसाय ध्वस्त भएको र दशौं लाख मानिस बेरोजगार भएको उल्लेख छ ।

विभागका अनुसार दोस्रो चौमासिक अवधिमा अघिल्लो वर्षको सोही अवधिको तुलनामा कूल गार्हस्थ्य उत्पादन १६.५ प्रतिशतले घटेको छ । यस अवधिमा फिलिपिन्स सरकारले कडा नियमहरुसहितको लकडाउन गरेको थियो । सरकारले यसअघि वर्षको सुरुका तीन महिनामा अर्थतन्त्र ०.७ प्रतिशतले मात्र खुम्चिने आँकलन गरेको थियो । तर सन् १९८१ यता पहिलो पटक अर्थतन्त्रमा सर्वाधिक असर परेको विभागको भनाई छ । विगत तीन दशकमा फिलिपिन्सको अर्थतन्त्र पहिलो पटक मन्दीतर्फ उन्मूख भएको हो ।

फिलिपिन्समा यसैसाता कोरोनाभाइरसबाट संक्रमितको संख्या एक लाख १५ हजार नाघेको छ । लकडाउन खुकुलो बनाएसँगै जुन महिनायता मात्र संक्रमितको संख्या पाँच गुणाले बढेको हो । सामाजिक–आर्थिक योजना सचिव कार्ल चुआले महामारी र यसबाट अर्थतन्त्रमा परेको असरले विषम परिस्थिति सिर्जना गरेको बताए ।

तर राष्ट्रपति रोड्रिगो डुटेर्टेले लामो समयसम्म मुलुकलाई बन्दाबन्दीको अवस्थामा राख्न नसकिने बताएका छन् । उनले भनेका छन्, ‘मुख्य समस्या भनेकै हामीसँग थप रकम अब छैन । हामी जनतालाई थप खाद्यान्न र राहत रकम बाँड्न सक्ने अवस्थामा छैनौं ।’ फिलिपिन्सको विप्रेषण पनि अघिल्लो वर्षको तुलनामा पहिलो पाँच महिनामा ६.४ प्रतिशतले घटेको छ । विदेशमा रोजगारी गुमाएका ठूलो संख्याका व्यक्तिहरु स्वदेश फर्किएका छन् । (आर्थिक दैनिकबाट)


क्याटेगोरी : अन्तर्राष्ट्रिय


तपाईको कमेन्ट लेख्नुहोस्